• ਅਫ਼ਸੋਸ ਦੀ ਗੱਲ ਹੈ ਕਿ 2021 ਵਿੱਚ, ਹਾਦਸੇ ਵਿੱਚ ਮਰਨ ਵਾਲਿਆਂ ਵਿੱਚੋਂ 36 ਲੋਕਾਂ ਨੇ ਸੀਟ ਬੈਲਟ ਨਹੀਂ ਲਗਾਈ ਹੋਈ ਸੀ।
• ਜ਼ਿਆਦਾਤਰ ਹਾਦਸੇ ਜਿੱਥੇ ਸੀਟ ਬੈਲਟ ਨਹੀਂ ਲੱਗੀ ਹੋਈ ਹੁੰਦੀ ਹੈ, ਖੇਤਰੀ ਇਲਾਕੇ ਦੀਆਂ ਸੜਕਾਂ 'ਤੇ ਹੁੰਦੇ ਹਨ।
• ਕਾਰ ਦੁਰਘਟਨਾ ਵਿੱਚ ਔਰਤਾਂ ਦੇ ਮੁਕਾਬਲੇ ਮਰਦਾਂ ਦੇ ਸੀਟ ਬੈਲਟ ਨਾ ਪਹਿਨੇ ਹੋਣ ਦੀ ਜ਼ਿਆਦਾ ਸੰਭਾਵਨਾ ਹੁੰਦੀ ਹੈ।
• 1970 ਤੋਂ ਕਾਨੂੰਨ ਦੁਆਰਾ ਵਿਕਟੋਰੀਆ ਵਿੱਚ ਕਾਰਾਂ ਵਿੱਚ ਸੀਟ ਬੈਲਟ ਲਗਾਉਣ ਦੀ ਲੋੜ ਹੈ ਅਤੇ ਇਸਨੇ ਗੰਭੀਰ ਜਾਂ ਘਾਤਕ ਸੱਟ ਦੇ ਜ਼ੋਖਮ ਨੂੰ 50 ਪ੍ਰਤੀਸ਼ਤ ਤੱਕ ਘਟਾ ਦਿੱਤਾ ਹੈ।
• ਸੀਟ ਬੈਲਟ ਜਾਂ ਢੁੱਕਵੀਂ ਬੰਧੇਜ ਪਹਿਨਣਾ ਇੱਕ ਕਾਨੂੰਨੀ ਲੋੜ ਹੈ। ਇਸ ਵਿੱਚ ਬੱਚੇ, ਬਜ਼ੁਰਗ ਅਤੇ ਗਰਭਵਤੀ ਔਰਤਾਂ ਸ਼ਾਮਲ ਹਨ।
• ਸੀਟ ਬੈਲਟ ਨਾ ਲਗਾਉਣ ਦਾ ਜੁਰਮਾਨਾ ਮਹਿੰਗਾ ਹੁੰਦਾ ਹੈ ਅਤੇ ਜੇਕਰ ਤੁਹਾਡੇ ਨਾਲ ਕਾਰ ਵਿੱਚ ਬੈਠੇ ਯਾਤਰੀਆਂ ਨੇ ਸੀਟ ਬੈਲਟ ਨਹੀਂ ਲਗਾਈ ਹੈ ਤਾਂ ਵੀ ਤੁਹਾਨੂੰ ਜੁਰਮਾਨਾ ਹੋ ਸਕਦਾ ਹੈ।
• ਸੀਟ ਬੈਲਟਾਂ ਨੂੰ ਸੁਰੱਖਿਅਤ ਢੰਗ ਨਾਲ ਲਗਾਇਆ ਅਤੇ ਸਹੀ ਢੰਗ ਨਾਲ ਐਡਜਸਟ ਕੀਤਾ ਜਾਣਾ ਲਾਜ਼ਮੀ ਹੈ। ਹਰੇਕ ਸੀਟ ਵਿੱਚ ਇੱਕ ਤੋਂ ਵੱਧ ਯਾਤਰੀਆਂ ਦਾ ਹੋਣਾ ਅਤੇ ਸੀਟ ਬੈਲਟ ਸਾਂਝੀ ਕਰਨਾ ਗੈਰ-ਕਾਨੂੰਨੀ ਹੈ।
• ਗੱਡੀਆਂ ਵਿੱਚ ਬਹੁਤ ਸਾਰੀਆਂ ਬੱਚਿਆਂ ਦੀਆਂ ਸੀਟਾਂ ਗਲਤ ਢੰਗ ਨਾਲ ਲੱਗੀਆਂ ਹੋਈਆਂ ਹੁੰਦੀਆਂ ਹਨ ਜੋ ਬੱਚਿਆਂ ਨੂੰ ਸੱਟ ਲੱਗਣ ਦੇ ਜ਼ੋਖਮ ਨੂੰ ਵਧਾਉਂਦੀਆਂ ਹਨ - ਇਸ ਬਾਰੇ ਆਪਣੇ-ਆਪ ਨੂੰ ਸਿੱਖਿਅਤ ਕਰਨਾ ਮਹੱਤਵਪੂਰਨ ਹੈ ਕਿ ਹਰੇਕ ਤਰ੍ਹਾਂ ਦੀ ਸੀਟ ਬੈਲਟ ਨੂੰ ਸਹੀ ਢੰਗ ਨਾਲ ਕਿਵੇਂ ਫਿੱਟ ਕਰਨਾ ਹੈ ਅਤੇ ਲੋੜ ਪੈਣ 'ਤੇ ਮੱਦਦ ਮੰਗਣੀ ਹੈ।
• 7 ਸਾਲ ਤੋਂ ਵੱਧ ਉਮਰ ਦੇ ਬੱਚਿਆਂ ਦੇ ਸੱਟਾਂ ਲੱਗਣ ਦੀ ਗਿਣਤੀ ਵਿੱਚ ਵਾਧਾ ਹੋਇਆ ਹੈ ਜਿਨ੍ਹਾਂ ਨੂੰ ਬਾਲਗਾਂ ਵਾਲੀ ਸੀਟ ਬੈਲਟ ਬਹੁਤ ਜਲਦੀ ਲਗਾਉਣੀ ਸ਼ੁਰੂ ਕਰ ਦਿੱਤੀ ਜਾਂਦੀ ਹੈ। ਹਰੇਕ ਬੱਚੇ ਨੂੰ ਬਾਲਗਾਂ ਵਾਲੀ ਸੀਟ ਬੈਲਟ ਲਗਾਉਣੀ ਸ਼ੁਰੂ ਕਰਨ ਤੋਂ ਪਹਿਲਾਂ ਉਸਦੇ ਸਰੀਰਕ ਆਕਾਰ ਨੂੰ ਵਿਚਾਰਨਾ ਮਹੱਤਵਪੂਰਨ ਹੈ।

ਸੀਟ ਬੈਲਟਾਂ ਕਾਰ ਦੁਰਘਟਨਾ ਵਿੱਚ ਲੱਗਣ ਵਾਲੀਆਂ ਸੱਟਾਂ ਦੀ ਮਾਤਰਾ ਨੂੰ ਘਟਾਉਣ ਲਈ ਸਹੀ ਸਿੱਧ ਹੋਈਆਂ ਹਨ। ਦੁਰਘਟਨਾਵਾਂ ਵਿੱਚ ਡਰਾਈਵਰਾਂ ਅਤੇ ਯਾਤਰੀਆਂ ਨੂੰ ਜ਼ਿਆਦਾਤਰ ਸੱਟਾਂ ਸਟੀਅਰਿੰਗ ਵ੍ਹੀਲ, ਡੈਸ਼ਬੋਰਡ, ਸ਼ੀਸ਼ੇ (ਵਿੰਡਸਕਰੀਨ) ਜਾਂ ਗੱਡੀ ਦੇ ਪਾਸਿਆਂ ਅਤੇ ਛੱਤ ਨਾਲ ਵੱਜਣ ਕਰਕੇ ਲੱਗਦੀਆਂ ਹਨ।

ਪ੍ਰੀਟੈਂਸ਼ਨਰ (ਪਹਿਲਾਂ ਤੋਂ ਖਿੱਚ ਪਈ) ਤਕਨਾਲੋਜੀ ਵਾਲੀਆਂ ਤਿੰਨ ਪੁਆਇੰਟ ਸੀਟ ਬੈਲਟਾਂ ਹਾਦਸਾ-ਗ੍ਰਸਤ ਹੋਣ ਦੀ ਸਥਿਤੀ ਵਿੱਚ ਸਭ ਤੋਂ ਵਧੀਆ ਸੁਰੱਖਿਆ ਪ੍ਰਦਾਨ ਕਰਦੀਆਂ ਹਨ। ਇਹ ਸੀਟ ਬੈਲਟਾਂ ਬੈਠਣ ਵਾਲੇ ਦੇ ਲੱਕ (ਗੋਦੀ) ਅਤੇ ਮੋਢੇ ਦੇ ਉੱਪਰ ਦੀ ਜਾਂਦੀਆਂ ਹਨ, ਜੋ ਦੋ ਪੁਆਇੰਟ ਸੀਟ ਬੈਲਟਾਂ (ਸਿਰਫ਼ ਲੱਕ 'ਤੇ ਲੱਗਣ ਵਾਲੀ ਬੈਲਟ) ਨਾਲੋਂ ਬਿਹਤਰ ਸੁਰੱਖਿਆ ਪ੍ਰਦਾਨ ਕਰਦੀਆਂ ਹਨ।

ਪ੍ਰੀਟੈਂਸ਼ਨਰ ਹਾਦਸਾ-ਗ੍ਰਸਤ ਹੋਣ ਦੀ ਸਥਿਤੀ ਵਿੱਚ ਡਰਾਈਵਰ ਅਤੇ ਕਾਰ ਵਿੱਚ ਸਵਾਰ ਯਾਤਰੀਆਂ ਨੂੰ ਬਹੁਤ ਤੇਜ਼ੀ ਨਾਲ ਅੱਗੇ ਉੱਲਰਨ (ਵੱਜਣ) ਤੋਂ ਬਚਾਉਣ ਲਈ ਸੀਟ ਬੈਲਟਾਂ ਨੂੰ ਕੱਸਦੇ ਹਨ ਅਤੇ ਢਿੱਲ ਨੂੰ ਘਟਾਉਂਦੇ ਹਨ। ਇਹ ਸਾਰੇ ਕਾਰ ਸਵਾਰਾਂ ਨੂੰ ਸੱਟ ਲੱਗਣ ਦੇ ਜ਼ੋਖਮ ਨੂੰ ਘਟਾਉਂਦਾ ਹੈ।

ਸੀਟ ਬੈਲਟ ਸੁਰੱਖਿਆ ਸੁਝਾਅ - ਨਵੀਂ ਗੱਡੀ ਖ਼ਰੀਦਣ ਵੇਲੇ, ਤੁਹਾਨੂੰ ਇਹ ਦੇਖਣਾ ਚਾਹੀਦਾ ਹੈ:

• ਪ੍ਰੀਟੈਂਸ਼ਨਰ - ਇਹ ਜ਼ੋਰ ਨਾਲ ਖਿੱਚ ਪੈਣ 'ਤੇ ਸੀਟ ਬੈਲਟ ਦੀ ਢਿੱਲ ਨੂੰ ਘਟਾਉਂਦੇ ਹਨ ਅਤੇ ਯਾਤਰੀਆਂ ਨੂੰ ਧੱਕੇ ਨਾਲ ਅੱਗੇ ਵੱਜਣ ਤੋਂ ਬਚਾਉਂਦੇ ਹਨ।
• ਵੈਬਿੰਗ ਕਲੈਂਪਸ - ਇਹ ਹਾਦਸਾ-ਗ੍ਰਸਤ ਹੋਣ 'ਤੇ ਬੈਲਟ ਨੂੰ ਹੋਰ ਬਾਹਰ ਨਿੱਕਲਣ ਤੋਂ ਰੋਕਦੇ ਹਨ, ਸਵਾਰਾਂ ਨੂੰ ਆਪਣੀ ਸੀਟ 'ਤੇ ਮਜ਼ਬੂਤੀ ਨਾਲ ਕੱਸਕੇ ਰੱਖਦੇ ਹਨ।
• ਲੋਡ ਲਿਮਿਟਰ - ਇਹ ਵਿਸ਼ੇਸ਼ਤਾ ਕੇਵਲ ਏਅਰਬੈਗ ਵਾਲੀਆਂ ਕਾਰਾਂ ਵਿੱਚ ਉਪਲਬਧ ਹੈ ਅਤੇ ਇਹ ਬੈਲਟ ਨੂੰ ਨਿਯੰਤਰਿਤ ਤਰੀਕੇ ਨਾਲ ਖੁੱਲ੍ਹਣ ਦਿੰਦਾ ਹੈ ਤਾਂ ਜੋ ਉਸ ਵਿਅਕਤੀ ਦੀ ਛਾਤੀ 'ਤੇ ਦਬਾਅ ਘੱਟ ਜਾਵੇ।
• ਫੇਰ-ਬਦਲ ਕੀਤੇ ਜਾ ਸਕਣ ਵਾਲੇ ਉੱਪਰਲੇ ਐਂਕਰੇਜ ਪੁਆਇੰਟ - ਬੈਲਟ ਨੂੰ ਗਰਦਨ ਦੀ ਬਜਾਏ ਮੋਢੇ ਉੱਪਰੋਂ ਆਰਾਮ ਨਾਲ ਲਗਾਏ ਜਾਣ ਦੇ ਯੋਗ ਬਣਾਉਂਦੇ ਹਨ।
• ਸੀਟ ਬੈਲਟ ਯਾਦ ਕਰਵਾਉਣ ਵਾਲਾ ਅਲਾਰਮ - ਇਹ ਡਰਾਈਵਰ ਨੂੰ ਚੇਤਾਵਨੀ ਦਿੰਦੇ ਹਨ ਜੇਕਰ ਕਿਸੇ ਵੀ ਵਿਅਕਤੀ ਨੇ ਆਪਣੀ ਸੀਟ ਬੈਲਟ ਨਹੀਂ ਬੰਨ੍ਹੀ ਹੈ।

ਲੱਕ ਅਤੇ ਮੋਢੇ ਵਾਲੀਆਂ ਸੀਟ ਬੈਲਟਾਂ:

• ਇਹ ਕਾਰ ਦੁਰਘਟਨਾ ਦੀ ਸਥਿਤੀ ਵਿੱਚ ਗੰਭੀਰ ਜਾਂ ਘਾਤਕ ਸੱਟ ਦੇ ਜ਼ੋਖਮ ਨੂੰ ਅੱਧਾ ਕਰ ਦਿੰਦੀਆਂ ਹਨ।
• ਗੱਡੀ ਚਲਾਉਂਦੇ ਸਮੇਂ ਸਾਰੀਆਂ ਸੀਟਾਂ ਸਿੱਧੀਆਂ ਖੜ੍ਹੀਆਂ ਹੋਣੀਆਂ ਚਾਹੀਦੀਆਂ ਹਨ, ਜਿਸ ਵਿੱਚ ਵਿਚਕਾਰਲੀ ਪਿਛਲੀ ਸੀਟ ਵੀ ਸ਼ਾਮਲ ਹੈ।
• ਉਹ ਗੱਡੀ ਜਿਸ ਵਿੱਚ ਉਪੱਰ-ਨੀਚੇ ਕੀਤੇ ਜਾ ਸਕਣ ਵਾਲੇ ਉੱਪਰਲੇ ਐਂਕਰੇਜ ਪੁਆਇੰਟ ਹੁੰਦੇ ਹਨ, ਉਹ ਬੈਲਟ ਨੂੰ ਗਰਦਨ ਦੀ ਬਜਾਏ ਮੋਢੇ ਉੱਪਰੋਂ ਆਰਾਮ ਨਾਲ ਲੱਗਣ ਦੇ ਯੋਗ ਬਣਾਉਂਦੇ ਹਨ।

ਸੁਰੱਖਿਅਤ ਕਾਰ ਲੱਭਣ ਲਈ How Safe is Your Car website(ਹਾਊ ਸੇਫ਼ ਇਜ਼ ਯੂਅਰ ਕਾਰ) ਨਾਮਕ ਵੈੱਬਸਾਈਟ 'ਤੇ ਜਾਓ।

ਆਪਣੀ ਸੀਟ ਬੈਲਟ ਫਿੱਟ ਕਰਨਾ:

ਇਹ ਯਕੀਨੀ ਬਣਾਉਣਾ ਕਿ ਸਾਰੇ ਯਾਤਰੀ ਸੀਟ ਬੈਲਟ ਲੱਗੇ ਹੋਣ ਨਾਲ ਸੁਰੱਖਿਅਤ ਹਨ, ਉਹਨਾਂ ਦੀ ਅਤੇ ਤੁਹਾਡੀ ਜਾਨ ਬਚਾ ਸਕਦਾ ਹੈ। TAC ਬਜ਼ਾਰ ਵਿੱਚ ਆਮ ਮਿਲਣ ਵਾਲੇ ਕਿਸੇ ਵੀ ਸਮਾਨ ਦੀ ਵਰਤੋਂ ਕਰਨ ਦੀ ਸਿਫ਼ਾਰਸ਼ ਨਹੀਂ ਕਰਦਾ ਹੈ ਜੋ ਬੱਚਿਆਂ ਵਾਲੀਆਂ ਸੀਟ ਬੰਧੇਜਾਂ (ਜਿਵੇਂ ਕਿ ਬੱਚਿਆਂ ਦੀਆਂ ਕਾਰ ਸੀਟਾਂ, ਬੂਸਟਰ ਸੀਟਾਂ ਜਾਂ ਵਾਹਨਾਂ ਦੀਆਂ ਸੀਟ ਬੈਲਟਾਂ) ਦੇ ਨਾਲ ਸਪਲਾਈ ਨਹੀਂ ਕੀਤਾ ਜਾਂਦਾ ਹੈ।

ਬਜ਼ਾਰ ਵਿੱਚ ਆਮ ਮਿਲਣ ਵਾਲਾ ਕਾਰ ਦਾ ਸਮਾਨ, ਜਿਵੇਂ ਕਿ ਗਰਭ-ਅਵਸਥਾ ਦੌਰਾਨ ਜਾਂ ਛੋਟੇ ਬੱਚਿਆਂ ਦੇ ਆਰਾਮ ਨੂੰ ਵਧਾਉਣ ਲਈ ਵੇਚਿਆ ਜਾਂਦਾ ਹੈ, ਉਹ ਹਾਦਸੇ ਵਿੱਚ ਬੈਲਟ ਦੀ ਪ੍ਰਭਾਵਸ਼ੀਲਤਾ ਨੂੰ ਰੋਕ ਸਕਦਾ ਹੈ, ਕਿਉਂਕਿ ਉਹ ਬੈਲਟ ਨੂੰ ਸਹੀ ਸਥਿਤੀ ਤੋਂ ਹਟਾਉਂਦਾ ਹੈ।